Nanawagan ang National Grid Corporation of the Philippines (NGCP) nga likayan ang mga pagpalupad og tabanog duol sa ilang mga transmission lines tungod kay mamahimo kining risgo sa kaluwasan ug pagkabalda sa operasyon sa ilang ahensya ug kasikbit nga mga power distribution companies.
Kini ang pahimangno sa NGCP pinaagi sa eksklusibong pakighinabi sa Bombo Radyo Cebu News Team kang Michael Ortega Ligalig, ang Corporate Communications and Public Affairs Senior Specialist sa ahensya diin namahayag kini sa ilang kampanya sa Anti-Kite Flying kay nagtumong sa pagpanalipod sa operasyon sa sektor sa kuryente ug ang general safety ilabi na sa mga kabatan-onan nga maoy hilig magpalupad og tabanog karong panahon sa ting-init.
Gani adunay insidente ang ilang natala sa lungsod sa Dumanjug ngadto sa ilang high voltage transmission line nga mao ang Visayas-Mindanao interconnection nga dakong epekto sa suplay sa kuryente diri sa Sugbo kung nigrabe og wala dayon maaksyoni ang insidente sa pagpalupad og tabanog.
Panawagan sa NGCP ngadto sa mga ginikanan, mga kabatan-onan, ug bisan ang mga lokal nga panggamhanan nga dasigon ang mensahe batok sa pagpalupad og tabanog palayo sa mga linya sa kuryente.
Striktong gipatuman sa NGCP ang anti-kite flying campaign doul sa ilang mga linya ug pasilidad nga nahisubay sa RA 11361 kun Anti-Obstruction of Power Lines Act.
