CEBU CITY-Gibana-bana nga dili muubos sa 20 ka mga armado nga grupo nga sakay sa 2 ka sakayan ang midunggo sa Sitio Matuog Brgy. Basak Guihulngan Negros Oriental pasado alas 5:00 kaganinang buntag. Kini maoy gi-kompirmar ni PO2 Rey Espada sa Guihulngan Police Station.
Sa pakighinabi sa Bombo Radyo Cebu kang PO2 Espada giingon niya nga adunay residente nga nagreport kanila nga adunay mga armadong grupo nga midunggo sa nahisgutang area. Giingong dali usab nga mi-responde ang mga pulis apan wala na kini naabtan.
Matud ni Espada nga basi sa ilang imbestigasyon, nga imposibleng Abu Sayyaf ang maong grupo tungod kay giingong wala may kontak ang mga Abu Sayyaf didto sa Guihulngan. Hinoon gi-angkon ni Espada nga mayorya sa mga Barangay sa Guihulngan puro bukid og giingong didto nakabasi ang mga NPA hayan posible nga mga Communist Party of the Philippines, New People’s Army, ug National Democratic Front o CCP-NPA-NDF kini.
Nasayran nga gi-drop lang ang maong mga armadong grupo sa area ug ang gisakyan niini padulong sa Cebu.
Sa karon padayon pa nga giberipikar sa mga pulis kung ang mga nahisgutang grupo mga Abu Sayyaf ba gyud o mga CCP-NPA-NDF. Nagmatyag usab sa area ang mga pulis gumikan na usab sa posibilidad nga adunay himoong dili maayo ang maong grupo.
Samtang, matud usab sa Police Regional Director sa Cebu nga si P/C Supt. Noli Taliño nga wala silay nadawat nga impormasyon kalabot niining giingong armadong grupo nga padulong sa Cebu.
Apan gitataw sa Director nga padayob gihapon ang ilang monitoring sa palibot kung ugaling adunay mga rebeldeng grupo nga musuway sa pagsulod sa Central Visayas.
