CENTRAL VISAYAS-Miuyon ang Visayas Command (VISCOM) ug naghatag sa ilang bug-os nga suporta samtang ang Armed Forces of the Philippines (AFP) ug ang Cebu Provincial Government nipirma og Memorandum of Agreement alang sa land swapping sa giila nga AFP-owned ug Cebu Province-owned parcel of land sa sulod Camp Lapulapu.
Matod ni Lieutenant General Benedict M Arevalo PA, ang Commander sa VISCOM human sa pagpirma MOA nga gihimo sa Cebu Provincial Capitol nagpadayag kini sa iyang bug-os nga suporta ug miuyon sa kasabotan tali sa AFP ug sa Provincial Government sa Sugbo tungod kay managsama ang ilahang panglantaw sa pagkab-ot sa malungtarong kalamboan sa probinsiya.
Gipangulohan nila ni DND Secretary, Gilberto C Teodoro Jr, kinsa maoy approving authority sa MOA, General Romeo S Brawner Jr PA, ang AFP Chief of Staff uban ni Gobernador Gwendolyn Garcia nga nagrepresentar sa Cebu Provincial Government, nga nipirma sa kasabutan.
Ang landmark signing gisaksihan nila ni Cebu Bise Gobernador Hilario P. Davide III ug Emmanuel Anthony V. Ramos, ang DND Assistant Secretary, uban nila ni Lt Gen Arevalo.
Sumala sa gilatid sa MOA, ang Cebu Provincial Government ug ang AFP mobalhin sa matag usa sa ilang giila nga gipanag-iya nga yuta sa Camp Lapulapu, ubos sa final survey aron matino ang aktuwal nga meters ug bounds, lakip ang mga istruktura, building, pasilidad, utilities, ug mga kalamboan.
Sa laing bahin, ang Kagamhanan sa Probinsiya sa Sugbo maoy mohimo sa relokasyon ug functional replication sa tanang apektadong mga estraktura, edipisyo, pasilidad, perimeter fence, ug mga utilities, lakip na apan dili limitado sa mga road network, electric ug water system sulod sa AFP-owned land ingon man ang mga gasto nga mahitabo sa panahon sa swapping ug replication.
Uban sa pagpirma sa MOA, ang Joint Technical Working Group sa AFP ug ang Cebu Provincial Government mo-draft sulod sa 30 ka adlaw sa Implementing Arrangement kalabot sa pagpatuman sa land swapping agreement, ubos sa una nga pagtugot sa DND ug sa Cebu Provincial Government.
