SIBONGA,CEBU- Patay ang usa ka 41-anyos nga misis human giluba sa iyang kaugalingong bana sulod sa ilang balay sa Sitio Mangga, Barangay Bahay, lungsod sa Sibonga sa buntag sa Hulyo 23, 2025.
Giila ang biktima nga si Catherine Caballero Sentillas, samtang ang suspek mao ang iyang bana nga si Benjamin Alfanta Sentillas, 47 anyos.
Sumala sa imbestigasyon sa Sibonga Police Station, mga alas-6:05 sa buntag, samtang nag-andam pa ang biktima aron moadto sa trabaho, gisulod siya sa kwarto ug giluba og kutsilyo sa suspek. Ang biktima naigo sa kiliran sa tiyan.
Human sa maong insidente, midagan paingon sa gawas sa balay ang suspek ug giluba usab ang iyang kaugalingong tiyan duha ka higayon.
Nakadungog sa kasaba ang ilang 17-anyos nga anak nga lalaki ug dali kining nangayo og tabang sa ilang silingan ug mga igsoon.
Ang biktima ug ang suspek gidalidali og dala paingon sa Deiparine Community Hospital, apan pag-abot sa tambalanan, gideklarar nang dead on arrival ang biktima.
Ang suspek, nga buhi pa, gi-admit sa maong ospital ug gikatakdang i-refer sa Vicente Sotto Memorial Medical Center sa dakbayan sa Sugbo alang sa dugang medikal nga pag-atiman.
Samtang, ang kutsilyong gigamit sa krimen narekober sa mga kapulisan ug gikuha isip ebidensya.
Sa pagkakaron, anaa sa hospital arrest ang suspek samtang andam na ang kapulisan sa pagsaka og kasong parricide batok kaniya.
Nagpadayon pa ang imbestigasyon sa kapulisan aron masuta ang hinungdan sa krimen, diin usa sa ilang gitutukan mao ang selos nga posibleng motibo.
