Nihangyo ang negosyante nga si Charlie “Atong” Ang sa Department of Justice (DOJ) nga ibalik ang iyang kaso bahin sa missing sabungero ngadto sa Philippine National Police-Criminal Investigation and Detection Group (PNP-CIDG) alang sa tukmang ug walay gidapigan nga imbestigasyon.
Personal nga miadto si Ang sa DOJ aron mosumiter og counter-affidavit sa kasong criminal sama sa murder, kidnapping, direct bribery ug tampering of passports.
Ang iyang abogado nga si Atty. Gabriel Villareal, niingon nga gusto ni Ang nga hatagan siya sa panel of prosecutors og pagtugot nga ibalik ang tibuok kaso ngadto sa CIDG.
Dugang pa, nga bisan og adunay katakus ang DOJ nga motabang sa PNP sa case build up, apan, ang imbestigasyon maoy nag-unang trabaho sa kapolisan ug dili sa piskal.
Dili gusto sa iyang kliyente nga ma-dismiss ang kaso tungod sa mahimo’g hunahunaon sa mga tawo, busa klaro nga gusto nila ang usa ka husto nga case build up, patas ug impartial investigation.
Gikatakdang ipadayon ang preliminary investigation sa Oktubre 21.
