MINGLANILLA, CEBU-Misangpot sa pagpatay ang usa ka away sa yuta sa usa ka 58-anyos nga lalaki sa Sitio Kambaye,Barangay Campo 7 sa lungsod sa Minglanilla, Cebu sa Sabado sa gabii, Hulyo 1, 2023.
Giila sa kapulisan ang biktima nga si Regino Dela Torre, samtang ang suspek giila nga si Mario Radana,73 anyos, ug ig-agaw sa biktima.
Base sa imbestigasyon sa kapulisan, ang motibo sa pagpatay sa biktima tungod sa away sa yuta.
Base sa inisyal nga imbestigasyon, ang saksi nga si Julito Patunog niingon nga nag-inom sila sa iyang mga higala ug si Dela Torre pasado alas 6 sa gabii, Nakahukom si Dela Torre nga mopauli una.
Sa iyang pagpauli, si Dela Torre kalit nga giatangan sa suspek, kinsa maoy first degree cousin sa biktima.
Gitigbas ni Radana ang buko-buko ni Dela Torre gamit ang bolo, nga naigo sa liog sa biktima.
Gidala dayon si Dela Torre sa Minglanilla District Hospital apan gideklarar kini sa attending physician nga dead on arrival.
Samtang ang suspek nasikop sa mga mirespondeng awtoridad human kini gitambagan sa mga barangay kagawad nga motahan.
Narekober sa kapolisan gikan kang Radana ang usa ka bolo nga adunay gisukod nga 18 ka pulgada.
Opisyal nga gipasakaan og kasong murder ang suspek human nipasaka og reklamo ang anak sa biktima gahapon Lunes, Hulyo 3, 2023, matod sa desk officer sa Minglanilla Police Station.
