CEBU – Nitubag og alarma ang mga personahi sa Abellana Police Station, alas 6:00 sa buntag sa Oktubre 24, 2022, kung diin adunay gituohang naghikog pinaagi sa paglukso sa ika-38 nga andana sa naasoy nga oras, lugar ug petsa.
Sa pag-abot sa maong dapit, ang biktima nakit-an nga nagbuy-od nga adunay daghang deperensya sa lawas.
Matud pa ni Police Lieutenant Colonel Wilbert Parilla, deputy director for administration sa CCPO, nga basi sa inisyal nga imbestigasyon nga gihimo sa Station 2, nasayran nga ang biktima naguol pag-ayo human siya nakasinati og sakit sa lawas samtang nagsulat sa iyang suicide note nga nakit-an sa bulsa sa iyang jeans.
Basi sa iyang gisulat sa “suicide note” “PLEASE HELP ME KUNG FLOP AKOA KAMATAYON PLS TIWASI NA LANG KO DUGAY NAKO GA ANTOS SA SAKIT NAKO MALOOY KA………”
Matod sa iyang kauban sa trabaho nga bag-o pa lang sa ilang Spa ang biktima ug ilang nabantayan nga adunay problema sa panghuna-huna ang biktima tungod kay sa ilang pagpangutana kaniya, lahi ra ang mga tubag niini sa hisgutanan ug mas namatikdan nila nga ang biktima nikatawa nga nag-inusara.
Nakadungog usab ang iyang kauban sa trabaho nga ang biktima kanunay nga moingon nga aduna siyay sakit nga wala niya ibutyag.
Base sa CCTV footage gikan sa Crown Regency, ang biktima misulod sa Crown Regency mga alas 5:00 sa buntag sa samang adlaw ug diretso sa elevator ug migawas sa 19th floor.
Gikan sa 19th floor nibalhin siya sa pikas elevator paingon sa 37th floor, gikan sa ika-37 nga andana, iyang gigamit ang hagdanan paingon sa ika-38 nga andana diin posibleng miambak siya ug nahulog sa dalan sa Osmeña Boulevard.
