CEBU – Nangayo og pasaylo sa lokal nga kapolisan ang usa ka babaye nga niangkon nga nakasinati og pagsulay sa pagdagit sa dakbayan sa Carcar human niangkon nga usa ka pangilad ang maong insidente.
Giila ang maong babaye nga si Kylie Mae Aledo, kinsa una nang nag-post sa iyang kasinatian sa social media, nidangop sa Carcar City Police Station ug nangayo og pasaylo sa mga police personnel sa iyang gi-post.
Sa una niyang post, si Aledo niingon nga ang mga wa mailhing tawo nga sakay sa puti nga sakyanan nisuway sa pagkidnap kaniya apan giingong napakyas ang laraw human naprotektahan siya sa iyang mga classmate.
Human nikatap ang maong post sa social media nakakuha sa atensyon sa lokal nga kapolisan sa dakbayan.
Hinungdan nga gimandoan ni PLt. Col. Ardioleto Cabagnot, hepe sa kapolisan sa dakbayan sa Carcar, ang dayon mga sakop sa pagsusi sa hitabo.
Pipila ka oras human gisusi sa kapolisan ang insidente, si Aledo ni-post og laing pamahayag sa iyang FB page, nga miangkon nga ang insidente nga iyang nasinati dili usa ka pagsulay sa pagdagit.
Gikompirmar ni Cabagnot nga miadto si Aledo sa ilang istasyon niadtong Biyernes, Agosto 26, aron personal nga mangayo og pasaylo kanila.
Matod ni Cabagnot nga samtang gipapas ni Aledo ang iyang unang post, gipabilin nila ang kopya niini alang sa legal nga katuyoan.
