Hingpit nang gi-instalar ang bag-ong Presidente sa Mandaue City College, pinaagi sa gipahigayung investiture ceremony sa Mandaue City Cultural and Sports Complex, adlawng Lunes Oktubre 27.
Giinstalar si Dr. Joey Rivamonte, isip bag-ong mangulo sa nahisgutang tunghaan, kung diin gikompirmar sa Civil Service Commission (CSC), nga nagtugot sa kolehiyo nga mosumiter sa kinahanglanon sa Commission on Higher Education (CHED) sa pag-aplay pag-usab alang sa accreditation aron makatanyag kini pag-usab og libre nga tuition.
Nagpasalamat usab si Mandaue City Mayor Thadeo Jonkie Ouano, alang sa pagbutang sa CSC kang Dr. Rivamonte isip bag-ong mangulo sa tunghaan, nga nagpakita sa kamahinungdanon sa maong lakang sa pagpahiuli sa kwalipikasyon sa kolehiyo alang sa libreng tuition program sa gobyerno ubos sa Unified Financial Assistance System for Tertiary Education (UniFAST), nga kaniadto gisuspinde human ang duha ka kanhing officer-in-chargenga napakyas sa pag kumpirmar sa CSC.
Samtang, nagpadayon ang kagamhanan sa Dakbayan sa Mandaue sa pag-abaga sa tuition sa mga estudyante sa MCC, nga adunay alokasyon nga P40 milyon aron masiguro nga ang ilang edukasyon magpadayun.
Sa pikas bahin, mapasalamaton usab si Rivamonte sa kagamhanan sa siyudad ug sa tibuok komunidad sa Mandaue City College.
Sigon usab niini nga ang seremonyas dili alang kaniya, apan alang sa matag estudyante sa kolehiyo nga puno sa paglaum alang sa mas maayong kaugmaon.
