Gikabutyag ni Atty. Rameses Victorious Gatchalian Villagonzalo nga “ideally,” dili ra makaapekto o makalangay sa pag-usad sa kaso nga giatubang karon ni former President Rodrigo Duterte ang paghulip karon ni British barrister nga si Peter Haynes gitudlo isip bag-ong lead legal counsel niini sa International Criminal Court (ICC) sugod Mayo 12, 2026.
Si Atty. Villagonzalo, kinsa usa ka ICC Accredited Lawyer, mibutyag atol sa eksklusibong pakighinabi sa Bombo Radyo Cebu news team kaniya nga dili ra kini makaapekto ang pagdumala na sa bag-ong legal counsel ni Duterte sa iyahang kaso sa ICC, gumikan adunay higayon pa nga gitagana ang Trial Chamber alang sa pagpangandam.
Dugang ni Villagonzalo, depende na usab kini sa Trial Chamber kung mosugot paba og resetting. Apan, matod niya, sa iyahang kaugalingong panglantaw, dili ra kini maka apektar, tungod kay sa pagdawat palang daan sa responsibilidad sa bag-ong legal counsel ni Duterte, obligado kini nga magtuon usab.
Kahinomdoman nga gitugotan sa International Criminal Court (ICC) Trial Chamber III ang hangyo ni Nicholas Kaufman nga mo-withdraw isip lead counsel ni Kanhing Presidente Duterte niadtong Mayo 11, 2026, human kini nisang-at sa iyahang hangyo niadtong Mayo 8.
Si Kaufman, kansang usa ka tuig nga kontrata natapos niadtong Marso 31, 2026, mihangyo nga mo-resign human mihangyo si Duterte nga i-reorganisa ang iyang defense team.
