CEBU CITY-‘Bahala og OA basta luwas’. Kini ang pamahayag ni Daanbantayan Mayor Sun Shimura human nga siya mipagawas og Executive Order sa iyang lungsod nga mag-sulob og face mask ug dili magpataka og pangluwa.
Kini subay na usab sa gikabalak-an karon nga Corona Virus.
Sa pakighinabi sa Bombo Radyo Cebu kang Mayor Shimura atol sa Bombohanay sa Udto program, gibutyag niini nga iyang nahimo ang maong lakang aron lamang sa pagsiguro nga luwas ang iyang mga ginsakopan subay sa iyang nadawat nga report gikan sa ilang tourism office nga dunay nangabot nga Chinese nationals sa Malapascua Island ug matud pa gipanghilantan.
Hinoon, sa ilang pag-imbestigar, nasuta nga natawo ang mga naasoy nga Chinese sa Wuhan kung diin nagikan ang naasoy nga Virus apan taud-taud na sila nga wala didto ug tungod sa kahago mao matud pa kini nga gihilantan. Basi usab sa result sa ilang RHU negatibo kini sa matang sa N-Cov.
Apan bisan paman, gipahibaw ni Shimura nga mas maayo gyud nga luwas inay nga mukompyansa.
Itinerary Inspection
Gimanduan na usab sa Mayor ang mga tigdumala sa mga V-hire nga maoy sagad nga sakyan sa mga langyaw nga Chinese nga tan-awon gyud ang ilang itinerary sa nakalabay nga 15 ka diyas. Kung gikan man gali matud pa kini sa Wuhan, China, kinahanglan nga balibaran lang gyud usa.
Gitino hinoon ni Shimura nga mapasalamaton siya sa pagdagsa sa mga Chinese tourist sa ilang lungsod–sa ilang mga inilang mga resorts apan siguroon usa nila ang kaluwasan sa panglawas ilabina karon nga grabe ang pagtutok sa prevention sa N-Cov.
