PROVINCE OF CEBU- Nanawagan si Balamban Mayor Amos Cabahug kang Presidente Ferdinand “Bongbong” Marcos Jr. nga tabangan unta ang lungsod sa Balamban sa pagpatukod pag-usab sa mga dalan ug tulay nga maoy sagad gamiton sa mga residente gikan sa kabukiran aron maihatod ang ilang mga produkto ngadto sa merkado.
Matod ni Cabahug, padayon pa karon ang clearing operations sa pipila ka bahin sa Transcentral Highway nga naapektuhan sa miaging mga bagyo.
Iyang gipahayag nga hilabihan ka dako ang kadaot, ilabi na sa upat ka mga tulay nga maoy agianan sa mga residente gikan sa kabukiran padulong sa merkado, nga naguba tungod sa mga nangaging kalamidad.
Tungod niini, nakasinati og dakong kalisod ang mga mag-uuma sa paghatod sa ilang mga produkto nga unta ibaligya sa merkado.
Mapasalamaton usab si Mayor Cabahug sa pagbisita ni Presidente Ferdinand R. Marcos Jr. sa Balamban, ingon man sa paghatag og mga medical equipment sama sa portable X-ray ug ultrasound machine, nga gipanghatag uban si PCSO General Manager Melquiades Robles alang sa mga provincial hospitals sa Cebu.
