Target sa House of Representatives nga susihon ang mga rekord sa bangko ni Bise Presidente Sara Duterte isip kabahin sa mga proseso sa impeachment, sumala ni House Deputy Speaker Representative Paolo Ortega.
Sa usa ka pamahayag, ang magbabalaod miingon nga ang mga alegasyon nga gisang-at sa ikaupat nga reklamo sa impeachment seryoso ug makahasol, nga adunay daghang mga pag-angkon nga nag-alegar sa mga bank account, kabtangan ug mga transaksyon sa pinansyal nga wala gideklarar sa Statement of Assets, Liabilities and Net Worth (SALN) sa Bise Presidente.
Sa ikaupat nga reklamo sa impeachment nga gisang-at batok sa Bise Presidente niadtong Pebrero 18, siya giakusahan sa giingong pagbudhi sa pagsalig sa publiko ug sad-an nga paglapas sa Konstitusyon.
Sumala ni Ortega, kung ang mga opisyal sa publiko gimandoan sa pagdeklarar sa tanan nga mga kabtangan ug pagpuyo nga yano, ang bisan unsang ‘material omission’ isipon nga usa ka seryoso nga constitutional concern, usa ka butang nga dili angay ibaliwala sa House.
Giklaro sa magbabalaod nga dili kini usa ka kombiksyon, apan usa lang ka proseso.
Kahinumduman nga ang net worth sa Bise Presidente misaka og kapin sa 1,000% sulod sa 17 ka tuig, gikan sa kapin sa P7.2-milyones niadtong 2007 ngadto sa P88.5-milyones base sa iyang SALN niadtong Disyembre 31, 2024.
