Grabe ang gipabati nga supporta alang sa mga Bar examinees alang sa katapusang adlaw sa 2026 Bar Examination, nga nagpaabot sa gawas sa testing center niadtong Dominggo, Setyembre 13, 2026.
Nakabati usab og kakulba ang mga taga suporta alang sa mga examinees, lakip na ang mga miyembro sa mga nagkadaiyang Bar Operations, alang sa ilang tagsa-tagsa ka mga tunghaan.
Matud ni Corinth Athea Ensalada, Bar Operations Chairperson sa Silliman University, sugod pa lang sa alas-2 sa kaadlawon ang ilang pag-pangandam sa pagkaon sa mga examinee, lakip ang pamahaw, ug paniudto nga ilang ihatud sa accommodations sa mga Bar takers.
Matud niini nga mahinungdanon pag-abag nila sa mga kinahanglanon sa matag examinee pinaagi sa ilang checklist, lakip ang essential materials nga dad-on sa testing center, human ma-download ang exam ug pagsunod sa mga lagda sa examination site.
Sukad niadtong September 4, nagpabilin sa Cebu ang grupo aron masuportahan ang mga Bar takers sa tibuok panahon sa examination, ang Silliman University nakabase sa Dumaguete City, ug tungod sa regionalized nga sistema sa Bar Examination, sa Cebu gihatag ang examination sa ilang mga examinee.
Matud ni Ensalada, mas sayon alang sa mga takers ug supporters ang pagbiyahe ngadto sa Cebu kumpara sa ubang travel options gikan sa Dumaguete
Dugang niini nga sa wala pa ang Bar week, nangalap og pondo ang organisasyon pinaagi sa pagbaligya og merchandise, pag-organisa og mga kalihokan sama sa fun-run ug pickleball tournament, ug pagpangayo og tabang gikan sa ilang mga alumni.
Matud ni Ensalada, tumong sa ilang organisasyon nga mapagaan ang ubang responsibilidad sa mga examinee aron mas makapokus sila sa ilang pagtuon ug sa pag-atubang sa Bar Examination.
Samtang natapos na ang tulo ka adlaw nga Bar Examination, padayon ang paghatag sa Bar Operations og suporta sa ilang mga examinee samtang naghulat sila sa resulta sa ilang gipaningkamotan.
