Barangay chairman, kauban niini gibanhigan-patay sa NegOr

CEBU CITY — Nagpadayon ang manhunt operation sa Negros Oriental Provincial Police Office (NOPPO) batok sa mga responsable sa pagpamanhig-patay sa usa ka barangay kapitan ug kauban niini sa Brgy. Kalamtukan, Bayawan City, Negros Oriental.

Gipaarakan sa dili moubos sa 10 ka mga armadong lalaki ang barangay rescue vehicle nga miresulta sa hinanaling kamatayon sa kapitan nga si Johnny Condez, 47 anyos, ug kauban niining si Danny Marata Jr., 16 anyos niadtong Sabado, Nobyembre 14 sa gabii.

Matud ni Police Colonel Julian Entoma, ang provincial director sa Negros Oriental PNP, nga nangita og cellphone signal ang kapitan sa maong lugar nianang panahona.

Daling mi-atake ang mga nagtagu-tago nga mga armadong lalaki gikan sa katubhan ug ilang gipauwanan og bala ang sakyanan sa barangay.

Miresulta kini sa pagkamatay sa duha human naputos sa samad-pinusilan ang ilang lawas.

Samdan usab ang mga kauban sa kapitan nga silang Danny Marata Sr., 48 anyos, ug laing kauban nga si Edilito Magbanua, 52 anyos.

Dugang pa ni Entoma nga nahimong persons of interest ang 10 ka mga armadong lalaki ug gipaubos kini sa manhunt operation alang sa pagkasikop kanila.

Gi-deploy na usab sa Negros Oriental PNP ang ilang tracker team alang sa dinaliang pagkasikop sa mga responsable sa pagpang-ambush.

Suspek sa pagpatay?

Panaglalis sa pamilya ang gilantaw karon nga motibo sa pagkamatay sa usa ka barangay kapitan ug ang kauban niini.

Matud ni Colonel Entoma nga si Kap. Johnny Condez mao gitumbok nga suspek sa pagpamusil-patay sa mag-amahang barangay councilors niadtong Nobyembre 14.

Kahinumduman nga namatay ang igsuon ni Johnny Condez nga si Felipe Condez ug pag-umangkon niyang si Jonesis Condez sa Brgy. Kalumbuyan human sila napusilan sa riding in tandem.

Dugang pa niini nga napasakaan na unta sa korte ang kasong double murder batok ni Johnny Condez.

Read more: Pagpatay sa mag-amahang konsehal sa NegOr personal grudge ang motibo; Igsoon sa biktima posibleng suspek?

Ipaubos unta sa search warrant ang kapitan sa Brgy. Kalamtukan human napamatud-an nga tigdala kini og armas de fuego apan nagkinahanglan sila og approval gikan sa korte.

Gibutyag usab ni Entoma nga namugna ang panaglalis sa managsuon tungod sa pulitika sa ilang barangay.

Nasayran usab nga gi-settle silang Johnny ug Felipe Condez sa buhatan ni Bayawan City Mayor Pryde Henry Teves aron mahunong na ang isyu sa pulitika.