MANDAUE CITY, CEBU-Adunay tulo ka rason nga nasinati ang grabing pagbaha sa Siyudad sa Mandaue kun adunay kusog nga pag-uwan diin naglakip sa basura nga nakaali sa gagmay’ng imburnal nga kinahanglang padak-an ug ang informal settlers nga nagtukod og barungbarung nga nakaali sa sapa.
Kini ang gibutyag atol sa gipatawag nga Press Conference ni Mayor Jonas Cortes uban nila ni City Administrator Jamaal James Calipayan, City Legal Officer Eddu Ybañez, City Planning and Development Officer Marlo Ocleasa, City Engineer Marivic Cabigas ug Assistant Administrator Florentino Ninor Jr. nga gipahigayon sa session hall kaganiha.
Matud ni Mayor Jonas Cortes ang tulo ka hinungdan sa grabing baha sa Siyudad natino human gisubay ang mga lugar nga nakasinati sa grabing pagbaha.
Tungod niini, gitukod ni Mayor Cortes ang usa ka task force nga gitawag og Akong Problema, Akong Sulbaron (APAS) nga gipangulohan ni Atty.Ybañez.
Dungang pa, nga gumikan sa problema sa pagpasagad og labay sa basura, ang Mayor mimando na sa mga Eco-Warden nga dakpon ang nasakpan samtang si Ybañez nagtinguha nga edukahon ang mga molopyo Arun masilsil sa ilang hunahuna nga ilang responsabilidad ang dili pagpasagad og labay sa basura kay mobalik Ra kanila ang problema sama sa baha.
Nagpadayon na usab ang paghabwa sa mga basura sa mga imburnal apil na ang mga balas nga nadala sa baha.
Sa ka gagmay’ng sa drainage, si Arct. Ocleasa nipresentar sa mga drainage projects nga gisugdan ug ipatuman nga mobalor og dul-an sa tunga sa bilyon ka pisos.
Giangkon hinuon ni Ocleasa nga kuwang kini kay niabot lang sa kinatibuk-ang P1.5 bilyones ang napatuman nga drainage projects nga gibasi sa paghuman sa master plan lima na ka tuig ang nakalabay’ nga gibanabana nga mogasto og P5 bilyones ug gipaabot nga modako kini kay nimahal na ang mga materiyales.
Malaumon hinuon si Mayor Cortes nga motabang ang Nasudnong gobiyerno sa pagtukod og drainage projects pinaagi sa DPWH.
Samtang ang problema sa informal settlers, ang Mayor miingon nga nagsugod na ang Siyudad sa clearing operations sa Barangay Banilad area ug makig-alayon sa Siyudad sa Sugbo sa Mahiga Creek nga utlanan sa duha ka Siyudad arun dili magbalikbalik nga tukoran og barungbarung pinaagi sa pagkiral niini.
