CEBU CITY — Sutaon sa habig sa barangay officials sa Brgy. Banilad, dakbayan sa Mandaue ang mga basura nga nagtipun-og sa Marober Ouano compound diin upat na ka buwan nang natanggong.
Sa reklamo nga gipadangat sa Bombo Radyo Cebu gikan sa usa ka concerned citizen, giingong wala gitagad sa barangay ang basura sa ilang dapit.
Nanghinaut ang concerned citizen nga mahatagan og dinaliang aksyon sa barangay sa dili pa ang Pasko.
Samtang gibutyag sa kapitan nga si Greg Yap wala sila nagpasagad sa pagkuha og basura.
Matud ni Yap nga usa na ka buwan nang naapektuhan ang regular nga paghakot sa basura gumikan kay naguba ang usa sa ilang mga garbage truck.
Gisuway nila og dangop ngadto sa Mandaue City Government aron maaksyunan apan, matud pa, wala silay nadawat nga aksyon.
Sa pagkakaron, mabalik na sa normal ang ilang regular nga paghakot sa basura human nakakuha ang barangay council og bag-ong dump truck alang niini.
Dugang pa ni Yap nga nakasabot sila sa sitwasyon ni concerned citizen apan gihimug-atan niini nga mas mahinungdanon pa gayud ang segregation sa basura imbes nga ilabay lang kini.
Subay na sa ilang aksyon sa maong reklamo, ilang i-monitor ang kahimtang sa Marober compound kalabot sa natanggong nga basura.
