Nakadawat og 28 ka radio challenges gikan sa usa ka barko sa China ang Philippine Coast Guard (PCG) ug ang Bureau of Fisheries and Aquatic Resources (BFAR).
Nahitabo kini samtang ang BFAR ug PCG nagpahigayon og Maritime Domain Awareness (MDA) flight sa Bajo de Masinloc niadtong Biyernes.
Ang PCG miingon nga naggamit sila og BFAR aircraft sa dihang nadawat nila ang mga radio challenges gikan sa usa ka barko sa Peoples’ Liberation Army-Navy sa lugar nga 81.42 nautical miles amihanan-sidlakan sa Bajo de Masinloc.
Nakakita usab ang PCG og duha ka boya nga iya sa China duol sa Bajo de Masinloc ug usa ka fighter jet.
Ang maong aircraft nagpahigayon og maniobra mga alas 10:30 sa buntag sa gihabogon nga gibana-bana nga 6,000 ka tiil.
Mitubag ang PCG sa mga radio challenges, nga ang mga MDA flights nahiuyon sa internasyonal nga balaod.
Masaligon ang PCG nga magpadayon sila sa pagpahigayon og regular nga MDA alang sa kaluwasan sa mga Pilipinong mangingisda ug sa soberanya sa Pilipinas.
