Naalarma ang Bureau of Immigration (BI) sa nagkadaghan nga mga kaso sa human trafficking nga may kalabotan sa catphishing.
Matod ni Immigration Commissioner Joel Anthony Viado, nga 14 ka mga biktima ang natala sulod lang sa usa ka semana human napugngan sila sa ahensya nga mobiya alang sa ilegal nga trabaho sa mga scam hub sa gawas sa nasud.
Diin ang unang operasyon nakaluwas sa tulo ka mga biktima, nag-edad og 33, 25, ug 27, kinsa gikatahong molupad paingon sa Thailand.
Matod sa Immigration Protection and Border Enforcement Section (I-PROBES), ang mga na-intercept sa airport maoy mga first-time traveller alang sa self-funded trip ngadto sa Thailand apan tungod sa ilang mga tubag sa mga pangutana sa mga immigration officer, gipaubos sila sa mas lawom nga eksaminasyon.
Dinhi nahibaw-an nga ang mga biktima gi-recruit alang sa trabaho sa Cambodia isip customer service representative sa usa ka business process outsourcing (BPO) company.
Samtang, kini nga ihap gidugangan sa 11 nga mga biktima niadtong Pebrero 5 nga sakay sa parehas nga eroplano nga paingon sa Thailand.
Sa imbestigasyon, gisaaran sila og P50,000 matag buwan nga suweldo alang sa trabaho sa BPO sa Pakistan.
Matod sa recruiter, ang mga biktima nagpakaaron-ingnon nga mga estudyante aron itago ang ilang mga Pakistani visa.
Gidala dayon ang mga biktima sa kustodiya sa Inter-Agency Council Against Trafficking (IACAT) alang sa dugang tabang ug alang sa pagpasaka og mga kaso batok sa ilang mga recruiter.
