Gipahimangnoan sa Bureau of Immigration (BI) ang publiko batok sa mga peke nga dokumento, sama sa mga suwat nga nagpakaaron-ingnon sa ahensya ug pagpangayo og kuwarta sa ilang mga nakadawat.
Matod ni BI Commissioner Joel Anthony Viado, ang mga mangingilad migamit sa maong matang sa suwat aron mahadlok ug daling madani ang biktima sa pagpadala og kuwarta. Usa sa mga kaso nga ilang nadawat mao ang peke nga suwat nga giingong gipirmahan ni Viado ug gipadala sa usa ka babaye sa Pampanga.
Dugang ni Viado, kabahin kini sa gitawag nga “love scam” diin gipatuo ang biktima nga gibabagan sa mga tugpahanan ang ilang mga nakarelasyon nga langyaw online.
Anaa sad sa sulat ang pahimangno nga hunongon ang kontak sa langyaw, uban ang mga hulga nga may kalabotan sa Anti-Money Laundering Act.
Gimando usab sa nasangpit nga sulat sa biktima sa pagkontak sa usa ka opisyal pinaagi sa social media ug mobile number, ug naghatag og instruksiyon sa pagpadala og kuwarta sa pribadong bank account nga dili awtorisado sa BI.
Giawhag ang publiko nga dili magpailad sa maong matang sa scam bisan pa og kauyabon pakag afam.
