Gianunsyo sa Bureau of Internal Revenue nga ilang ipatuman ang pagbutang og tax stamps sa tanang vape products nga gibaligya sa nasod sugod sa Hunyo.
Kini pinaagi sa BIR Revenue Memorandum Circular 59-2024 nga gilagdaan ni BIR Commissioner Romeo Lumagui niadtong Abril 30 nga gitumong aron matubag ang pagdagsa sa mga unregulated vape products sa kamerkaduhan.
Basi sa maong direktiba, ang locally manufactured vapes dili mabalhin gikan sa production sites nga walay bag-ong tax stamps.
Dugang pa niini, giingon usab sa ahensya nga higpit nga gidili ang importasyon ug pagpagawas sa mga produkto sa vape gikan sa kustodiya sa Bureau of Customs gawas lang kung adunay prescribed nga revenue stamps sa maong produkto.
Matod sa BIR, ang presyo sa tax stamps gitakda sa P1 matag piraso sa mga order nga minimum nga 1.65 milyones ka piraso ug P2.50 matag piraso sa order nga 165,000 ka piraso.
Samtang, ang mga tiggama ug importer sa vape kinahanglan usab nga mobayad og excise tax sa bisan unsang klase o kantidad sa produkto sa vape.
Subay niini ang mga vape manufacturer mahimong magsugod sa pagbutang og mga selyo sa buhis sa ilang mga order sugod karong Mayo 8, 2024.
