PROVINCE OF CEBU- Mapasigarbuhong girepresentar sa Sugbo ang Pilipinas sa global stage sa 22nd China-ASEAN Expo (CAEXPO) ug 2025 Guangxi International Sister Cities events nga gipahigayon sa Nanning International Convention and Exhibition Center sa China.
Nangulo sa delegasyon si Cebu Vice Governor Glenn Anthony Soco, nga gihatagan ug dungog nga mamulong atubangan sa mga lider sa kalibutan, senior nga opisyal, ug mga representante sa ASEAN member countries.
Sa interbyu sa China News Service, gipasabot ni Soco nga ang Sugbo dili lamang usa ka mapinalanggaon nga destinasyon sa turismo, kundili usa usab ka lig-on nga ekonomikanhong powerhouse sa Kabisay-an.
Gipasigarbo niya ang dagkong sektor sa lalawigan sama sa eksport, shipbuilding, manufacturing, IT ug BPO.
Gipasiugda usab ni Soco ang world-class nga transport infrastructure sa Sugbo, lakip na ang Mactan-Cebu International Airport, modernong mga pantalan, ug maayong road networks nga naghimo sa lalawigan nga usa ka bukas nga ganghaan sa negosyo ug pamuhunan.
Gipresentar usab niini ang kultura, natural nga kahayag, ug turismo sa Sugbo, nga nakadani ug kapin sa 3 milyong bisita niadtong 2024.
Gihulagway niya nga dugay na nga relasyon tali sa Sugbo ug Guangxi isip tulay sa panaghigalaay ug oportunidad.
Matud sa bise gobernador, pinaagi sa mga plataporma sama sa CAEXPO, mas mapalig-on pa ang relasyon sa Sugbo sa mga silingan niini sa China ug ASEAN region.
