Nakabsan sa kinabuhi ang usa ka 23 anyos nga dalaga human mapiit ang ulo sa tailgate sa gisakyang minidump human madumbulan sa dumptruck ang ilang gisakyan pasado ala 1:00 sa hapon Abril 18, 2026 didto sa Brgy. Balirong, City of Naga.
Giila ang biktima nga si Gayle Ubra Olandria, 23 anyos, residente sa Guadalupe, Cebu. Naangol usab ang kaubang sakay nga sila si; Cristene 20 anyos ,dalaga , Maria, 22 anyos, dalaga, pulos mga residente sa Brgy. Poblacion, Talisay, City.
Gikataho nga gikan sa Mt. Naupa sa Brgy. Lanas Naga ang mga biktima nga giingong nag hiking samtang padulong kini nga mopauli mihangyo kini nga mosakay sa luyo sa “minidumptruck” nga padulong usab sa Naga proper nga gimaniho ni Alexander Yanong Candol, minyo nga taga Brgy. Tungkop, Minglanilla.
Apan pag abot sa nahitaboan giingong kalit nga midumbol sa likod nga bahin sa “mini dumptruck” ang lain pud nga dump-truck nga gimaneho ni Raymart Paran Sepada, residente sa Toledo City.
Tungod sa kusog nga impact, nalagpot ang mga biktima hinungdan nga nakabsan si Olandria, gumikan sa pagkapiit niini sa tailgate sa maong minidump.
Kasamtangan karon nga gitanggong sa prisohan si Paran, ug giandam na ang tukmang kaso batok niini.
Samtang sa pikas bahin, nakalas usab ang usa ka 36 anyos nga lalaki human ma bangga ang iyang gi maneho nga motorsiklo sa sementado nga koral sa National Highway sa Barangay South Poblacion sa siyudad sa Naga pasado alas 3:30 sa kaadlawon, Domingo, Abril 19, 2026.
Giila ang biktima nga si Ezekiel Habel Sofia, 36, taga San Roque Street, Barangay Lipata sa lungsod sa Minglanilla.
Matud ni PCapt. Carlos Narca ang Deputy Chief sa Naga City Police, nga kusog nga naka padagan ang biktima nga nag subay sa National Highway gikan sa lungsod sa Minglanilla.
Pag abot sa maong dapit nawagtangan og control ang driver nga si Sofia sa iyang motorsiklo hinungdan nga mibangga kini sa koral ug miresulta sa dakong kadaot sa iyang ulo nga maoy hinungdan sa iyang kamatayon.
