Gikabutyag ni Celestino ‘Tining’ Martinez, Board Member 4th District, ug ABC Federation President, nga nagduso siya og resolusyon alang sa sunod nga sesyon nga nag-awhag House of Representatives ug sa Senado alang sa aron sa paghuna-huna og usa ka bill nga nagtumong sa pag-ban sa paggamit og social media sa mga batang nag edad og 16 pa-ubos.
Atol sa eksklusibong pakighinabi sa Bombo Radyo Cebu kang Martinez, siya nagkanayon nga ang pagkalambigit karon sa kabataan sa social media usa sa mga rason sa hinay-hinay nga pagkawala sa mga values, nga imbes matutukan ang ilahang pagdako ug kalamboan, ug ang pagpadako sa mga ginikanan sa bata na ingun nalang og napasagdahan tungod sa social media.
Busa, nanghinaot siya nga ang maong bill nga iyahang giduso molusot na o mapasar na, tungod kay mao usab ni ang napanglantawan usab sa ubang nasud kinsa mipasar sa susamang balaodnon.
Hinungdan nga malaomon si Martinez nga mabaton usab kini sa Pilipinas. Tungod kay matod pa niya, importante nga ma-restore ang mga values sa mga bata.
Dugang pa ni Martinez, ang mga duwa karon nga giingong adunay impluwensya sa mga bayolenting lihok sa mga bata, matod niya, nalangkob na kini sa pagsugod sa pag-ban sa paggamit og social media sa mga batang ga edad og 16 pa-ubos.
Hinuon iyang giklaro nga dili angay dali-dalion ang tanan, ug gikinahanglang han-ayon, pwera nalamang kadtong mga sensitive websites nga angay lang gayud nga i-ban alang sa mga 16 pa-ubos, susama usab sa lakang nga gipahamtang sa laing nasud.
