BOGO CITY,CEBU- Mitaho ang Kagamhanang Dakbayan sa Bogo sa amihanang Sugbo kabahin sa kahimtang sa ilang syudad human sa pagtay-og sa linog niadtong Lunes sa hapon, Abril 6, 2026.
Sa giluwat nga opisyal nga pamahayag ni Bogo City Mayor Mayel Martinez nga pasalig nila ang ilang hugot nga monitoring mugna sa nasinating linog kagahapong adlawa.
Asoy pa niini nga sa ilang initial assessment ug reports gikan sa mga buhatan sa City Hall kay walay natalang dagkong kadaot sa imprastruktura sa ilang syudad.
Apan sa natad sa mga sibiliyan kay adunay mga natala nga mga minor injuries lakip na tong usa ka babayeng empleyado nga milayat sa ikaduhang andana sa usa ka building tungod sa kahadlok sa pag-uyog sa linog. Maayo nalang og dali nga nahatagan sa atensyon medikal kini aron maulian.
Giawhag sa mayor ang publiko nga magpabiling kalma ug magbinantayon sa mga musunod nga oras ug adlaw tungod kay adunay mga posibilidad nag sagunson nga mga aftershocks gikan sa inisyal nga linog.
Pasalig niini nga naka-andam ang ilang mga emergency response teams kauban sa pakigkoordinar sa mga barangay units ug uban pa aron sa pag-monitor sa lakat sa panghitabo aron sa tukmang aksyon.
Gidasig pud niini ang publiko nga likayan ang pagpakatap sa sayop nga kasayuran nga makahatag ra og dugang kahadlok sa katilingban.
