Gihatagan sa Land Transportation Office (LTO) Region 7 ang mga motorista sa Bohol og usa ka buwan nga lugway, aron makatuman sa mga kinahanglanon sa pagparehistro ug paglilisensya sa mga sakyanan sa dili pa magsugod ang mas estrikto nga pagpatuman niini sa buwan sa Septiyembre.
Una niini, adunay og tulo ka semana lang ang mga motorista aron matuman ang maong mga requirements, apan gilugwayan ang grace period nunot sa pag-apelar ni Gobernador Erico Aristotle Aumentado ngadto kang LTO Region 7 Director Glen Galario atol sa press conference niadtong Agosto 11.
Sa pamahayag ni Aumentado, ang extension maghatag og igong panahon sa mga residente sa pag-renew sa driver’s license, pag-update sa mga rehistrasyon, ug pagtagbo sa ubang legal nga kinahanglanon, pagtabang sa paglikay sa kalit nga silot ug pagsiguro nga ang tanan adunay kaalam.
Giawhag usab niya ang mga kaubanang Boholano niini nga pahimuslan kining higayuna ubos sa pagtuman sa ilahang gikuptang obligasyon.
Samtang si LTO Region 7 Director Glen Galario nitawag sa hangyo sa gobernador nga “just fair” ug nipasidaan nga sugdan na sa Septiyembre ang mas estrikto nga pagpatuman sa Republic Act 4136, ang Land Transportation and Traffic Code.
Sa Land Transportation and Traffic Code, gilangkoban kini sa mga pagsusi alang sa balido nga mga lisensya, husto nga pagrehistro sa awto, pagpugong sa dili awtorisado (colorum) nga mga operasyon, ug husto nga pagpakita sa mga plaka sa lisensya.
Subay niini, mamahimong ma-claim sa mga motorista ang ilang mga plaka sa buhatan sa LTO-Tagbilaran hangtod Oktubre 31, 2025, ug nag-awhag usab si Galario ang mga tag-iya og sakyanan nga i-verify ang availability sa plate online o sa pinakaduol nga sanga sa LTO.
