CEBU CITY-Gipasidunggan sa Bureau of Fire Protection ubos sa buhatan sa Cebu City Fire Office ang Bombo Radyo Cebu subay sa pakigtimbayayong sa pag-obserbar sa ‘Fire Prevention Month’ sa bag-o lang nahuman nga buwan sa Marso.
Atol sa Culmination Program sa Cebu City Fire Station nga gipangulohan ni Fire/Supt Reynaldo D. Enoc, ang City Fire Marshal arun sa pagselebrar sa mga kalihukan nga nagmalapuson nga giubanan sa suporta nga gihatag gikan kang Cebu Provincial Fire Marshal F/Supt Manases Bautista.
Gipasiugdahan usab ang programa sa Assistant Regional Director for Operation nga si F/SSupt Pedro Balatero Jr.
Giila sa Cebu City Fire Station ang kamahinungdanon sa aktibong pag-apil sa komunidad sa paglikay sa sunog ug pagresponde sa emerhensya. Pinaagi sa hiniusang paningkamot, ang estasyon ug ang komunidad nakatukod ug lig-on nga panag-uban sa pagsiguro sa kaluwasan ug kaayohan sa tanan.
Subay niini, ang Bombo Radyo Cebu mipadayag sa wala’y puas usab nga pasalamat sa gihatag nga pagsalig diin pinaagi sa among plataporma nga mapaabot ang mga impormasyon ngadto sa katawhan.
