-- ADVERTISEMENT --

Gipili ang British nga aktor nga si Robert Pattinson isip sunod nga modala sa sikat nga karakter ni James Bond.

Gipahibalo kini sa Amazon MGM Studios human mibiya si Daniel Craig sa long-running spy series.

Ang prangkisa sa James Bond nagsugod niadtong 1962, diin si Sean Connery ang unang aktor nga midala sa maong papel.

Sa pagkakaron, ang halin sa mga tiket niini sa tibuok kalibotan niabot na sa kapin sa $7 bilyones.

Ang umaabot nga pelikula nga pagabidahan ni Pattinson idirek ni Denis Villeneuve, kinsa nailhan sa iyang mga trabaho sama sa “Dune” trilogy ug “Arrival”, samtang ang script gisulat sa Briton nga screenwriter nga si Steven Knight.

-- ADVERTISEMENT --

Matod sa aktor, usa ka dakong dungog ang mapili aron modala sa karakter ni James Bond.

Gihulagway niya kini isip katumanan sa usa ka dugay na nga damgo, ug nagkanayon nga kanunay siyang nagtinguha nga makuha ang maong papel.

Naglaom ang mga producer nga pinaagi sa pagkuha kang Pattinson—nga nabantog sa iyang pagdala isip Edward Cullen sa serye nga “Twilight” uban sa aktres nga si Kristen Stewart—madani ang mas batan-on nga mga tumatan-aw, ilabi na ang mga fan nga sakop sa Gen Z.