CEBU CITY-Posibling mag-atubang og kawalay kasiguraduhan ang sugot nga 2025 budget sa kagamhanang dakbayan sa Sugbo kung sa higayong dili kini mapasar sa wala pa ang Biyernes, Disyembre 27, 2024.
Kini human ang proposed budget allocation kay nakatanggong pa sa konseho sa dakbayan diin 7 ka adlaw nalang sa dili pa matapos ang tuig og posibling mabalda ang mga priority projects sa pagdumala ni Cebu City Mayor Raymond Alvin Garcia.
Lakip sa gipaningkamotang maapil para sa budget sunod tuig kay ang renovation sa Archive Building, konstruksyon sa bag-ong legislative building ug bag-ong Department of Veterinary Medicine and Fisheries (DVMF) building.
Ang proposed budget ni Mayor Garcia kay mukabat sa P17.9-bilyones nga anaa pa karon sa pagtuki sa mga konsehales sa dakbayan sa ilang sesyon sa lehislatura.
Tungod niini, posibling ma-reenact ang budget sa tuig 2024 nga nagbalor sa kaping P25-bilyones nga mas taas og P8-bilyones ikumpara sa gisugyot sa kasamtangang administrasyon.
Sa press conference niadtong Lunes, Disyembre 23, giawhag ni Mayor Garcia ang konseho sa pagpadali sa pag-aprobar sa iyang “realistic” budget, nga gitumbok nga ang konseho nipasar og “unrealistic budget” nga mokabat sa P50 bilyones sa 2023 ug P25 bilyones sa 2024, nga usa ka dakong pagkunhod gikan sa P100 bilyones nga orihinal nga gisugyot sa panahon ni Former Cebu City Mayor Michael Rama.
