Ipaubos sa sa masusing structural integrity inspection ang taytayan sa Butuanon River nga nahimutang sa eskina UN Avenue ug MC Briones Street sa dakbayan sa Mandaue.
Kini human sa rekomendasyon nga giisa sa Philippine Institute of Civil Engineers (PICE) Cebu Chapter.
Ang rekomendasyon sa grupo kay nag-ugat sa pangutana sa pipila ka mga lumulupyo atol sa ilang board meetings nga nagkwestiyon sa integridad og kalig-on sa taytayan nga sagad agian kini sa mga bug-at nga mga behikulo samtang maghuwat sa “go/green signal” sa traffic light.
Sa liham nga gipadangat sa buhatan sa Traffic Enforcement Agency of Mandaue (TEAM) nga gipamahayag ni Hyll Retuya nga sumala pa sa PICE nga bisan pa man ang taytayan makasugakod sa bug-at nga mga karga sa mga mga sakyanan apan angay gihapon kining susihon aron masukod ang kalig-on niini.
Gani dugang pa ni Retuya diin gikumpirmar niini ang diskusyon sa nahitabong traffic board meeting nga gilangkoban pa sa representante sa Department of Public Works and Highways aron sila mismo musuta sa kondisyon sa taytayan.
Dugang pa nga ang adjustments kay kinahanglan magbalanse sa kaluwasan sa publiko ug pabiling hanoy nga dagan sa trapiko.
