PROVINCE OF CEBU- Mipahimangno ang kanhi Provincial Consultant nga si Byron Garcia ngadto kang Governor Pamela Baricuatro ug sa iyang mga kaubanan nga dili angay magbalat-sibuyas.
Gibutyag kini ni Garcia atol sa iyang gipahigayon nga press conference, diin iyang gihimug-atan nga dili dapat daling madutlan sa saway ang mga opisyal sa kagamhanan sa probinsya kung ugaling sawayon niya ang ilang agi sa trabaho.
Matud niya, ang iyang estilo sa pagpadayag gisagulan og komedya aron malingaw ang mga mosunod sa iyang vlog, apan paagi usab kini aron ipaabot ang iyang obserbasyon sa agi sa mga opisyal.
Gidugang ni Garcia nga kinahanglan nga molihok ang probinsya aron malikay sa saway, ug nilitok sa maong panultihon nga “buhat ang pasultihon, dili istorya ang pabuhaton.”
Bahin sa iyang mga giatubang nga kaso, sumala niini nga gitugyan na niya kini sa iyang mga abogado gumikan kay sila ang mas nasayod sa legal nga aspeto.
Kahinumdoman, nadakpan si Garcia niadtong Hunyo 11, 2026, tungod sa kasong pagsupak sa Safe Spaces Act (Anti-Bastos Law) nga gipasaka ni Dr. Elisse Nicole Catalanan—nga anak ni Gov. Baricuatro—gumikan sa giingong pagpangsaway ni Garcia sa pisikal nga aspeto niini.
