Temporaryong gisuspenso sa kagamhanang lungsod sa Alegria ug Badian sa habagatang-kasadpang Sugbo ang mga canyoneering ug uban pang fresh water related activities tungod sa lapok nga tubig ug kusog nga haguros sulog sa suba sa maong mga dapit.
Sa lungsod sa Alegria, ang ilang Municipal Disaster Risk Reduction and Management Office (MDRRMO) ug Municipal Tourism Office kay mipahibalo sa publiko sa temporaryong suspension sa maong canyoneering activities sa mga turista, operators, ug tour guides sa Kanlaob River ug Cambais Falls tungod sa kondisyon niini nunot lapokon nga tubig (murky and muddy waters) tungod sa kusog nga bunok sa uwan sa bukiran bahin.
Epektibo ang kamanduan niadtong Domingo, Hunyo 22 diin mulangtod kini hangtod sa dili pa ideklarar nga luwas para sa publiko ang kahimtang sa suba.
Samtang sa lungsod sa Badian, gisirado sab niini ang tanyag nga Kawasan Falls sukad sab niadtong Dominggo tungod sa susamang kahimtang sa panahon nga nagdala og risgo para sa mga mubisita lakip na ang mga musalmot sa mga water related activities.
Ang mga opisyal sa duha ka lungsod hugot nga nag-monitor sa sitwasyon ug ipahibalo ang pag-abli pag-usab sa mga apektadong destinasyon sa turista sa higayon nga moayo ang kahimtang ug kini giisip nga luwas nga ipadayon ang mga kalihokan.
