CEBU CITY-Giaprobahan sa Catholic Bishops’ Conference of the Philippines (CBCP) ang sugyot sa Roman Catholic Archdiocese of Cebu (RCAC) nga magtukod og mga bag-ong diosesis sulod sa ‘ecclesiastical jurisdiction’ sa ika-126 nga plenary assembly.
Si Cebu Archbishop Jose Palma nipahibawo sa pagkaporma sa “Sugbuswak,” ang termino sa Archdiocese alang sa pagmugna og mga bag-ong diyosesis.
Ang pag-apruba sa CBCP usa lang sa mga kinahanglanon aron mapalambo ang Sugbuswak.
Human maaprobahan sa CBCP, ang Sugbuswak proposal iduso ngadto sa Roma alang sa dugang pag-uyon.
Si Palma nipadayag sa iyang paglaum nga ang Vatican mohatag og pagtugot alang sa “Sugbuswak,” o ang sugyot sa pagbahin sa kinadak-ang archdiocese sa Pilipinas alang sa mas maayong pastoral nga pag-atiman.
Matud ni Palma nga ang dakbayan sa Carcar maoy gikonsiderar nga sentro sa plano sa diocese sa habagatan.
Ang mga dakbayan sa Danao ug Bogo gikonsiderar nga sentro sa giplanong diocese sa amihanan.
Matod ni Palma nga kinahanglang mabahin ang artsidyosesis tungod kay pipila sa mga matuuhon kinahanglang mobiyahe ug layo aron makaabot sa ilang tagsa-tagsa ka parokya.
Ang plano sa Sugbuswak, matod niya, nagtumong sa “pagserbisyo sa daghang mga tawo, labi na sa mga hilit nga lugar ug isla sa probinsya.”
Ang Sugbuswak maoy kombinasyon sa pipila ka pulong: Sugbu, ang lumad nga ngalan sa Sugbo; Ang “sugwak,” nagpasabut nga mobuto, ug ang “buswak,” nagpasabut nga mamulak.
