Nanawagan ang Catholic Bishops’ Conference of the Philippines (CBCP) ngadto sa tanang magtutuo sa pagsagop sa “Digital Media Fasting” isip usa ka paagi sa paghinulsol ug pagbag-o sa kaugalingon dungan sa pagsugod sa panahon sa Kuwaresma.
Gipasiugda sa kapunungan sa mga obispo nga ang tinuod nga pagpuasa dili lamang kutob sa paglikay sa pagkaon, kondili lakip na ang paggahin og panahon layo sa mga gadgets, social media, ug uban pang digital distractions nga sagad makabalda sa relasyon sa tawo ngadto sa Diyos ug sa isigka-tawo.
Tumong niini nga mabalik ang “interior silence” ug mas mapalawom ang pag-ampo pinaagi sa paglimita sa paggamit sa teknolohiya nga usahay nagmando na sa kinabuhi sa kadaghanan.
Daghan og maayong bunga ang makuha gikan niining digital fasting sama sa mas lawom nga relasyon sa Labaw’ng Makagagahum, katin-aw sa huna-huna, kalinaw sa emosyon, ug mas lig-on nga koneksyon sa pamilya ug komunidad.
Giklaro sa CBCP nga ang teknolohiya usa ka grasya kon gamiton sa saktong paagi, apan ang sobra nga paggamit niini nagdala og kakapoy ug pagkawala sa focus sa mas importante nga mga butang sa kinabuhi.
Isip giya, giawhag ang mga Katoliko sa paglikay sa paggamit og cellphone sa dili pa matulog ug inig mata, paglimit sa oras sa streaming, ug paggahin og mga higayon nga walay gadgets panahon sa pagpangaon ug panagpundok sa pamilya.
