Gikatahong matapos na karong Setyembre 30 ning tuiga ang Cebu Bus Rapid Transit loan subay sa padayon nga paningkamot sa kagamhanan sa dakbayan sa Sugbo sa pagrepaso ug pagsulbad sa mga nagpabiling isyu kalabot sa proyekto nga CBRT aron masiguro nga matubag ang mga prayoridad ug panginahanglan sa mga lumulupyo sa dili pa hingpit nga ipadayon ang proyekto.
Matod ni Kenneth Siasar, Chief of Staff sa Mayor sa Siyudad sa Sugbo, gikinahanglan nga balikan ug ipahiuyon ang mga komunikasyon ug probisyon nga may kalabotan sa proyekto, ilabi na sa hisgutanan sa mga deadline sa utang ug mga bayranan nga wala pa mahusay alang sa mga propiedad nga naapektuhan sa proyekto sa Department of Public Works and Highways (DPWH).
Dugang ni Siasar nga ang Opisina sa Mayor ug ang Konseho sa Siyudad o ang Opisina sa Bise Mayor nagtinabangay karon sa pagplano ug pagpangandam, aron masiguro nga natan-aw ang tanang aspeto samtang nagpadayon sa mga pagpangandam.
Gipasiugda usab niini nga nagpabiling dako ang kabalaka sa kagamhanan alang sa mga apektadong pamilya ug pribadong tag-iya sa yuta nga padayong nag-atubang og mga kalisdanan, sanglit wala pa sila makadawat sa angay nga bayad o kompensasyon alang kanila. via Bombo Fons Cabrillos
