Gitaho sa Chinese state media nga ang China Coast Guard (CCG) mipataas sa ilang bandila sa Sandy Cay o nailhan sa Pilipinas nga Pag-asa Cay 2 sa Spratly Islands ug mideklarar og ‘sovereign jurisdiction’ sa maong lugar.
Sumala sa taho, ang insidente nahitabo sa tunga-tunga sa Abril, diin ang mga kawani sa CCG nagpahigayon usab og inspeksyon ug paglimpyo sa reef.
Gikompirmar sa Armed Forces of the Philippines (AFP) nga moluwat og opisyal nga pamahayag ang National Task Force for the West Philippine Sea (NTF-WPS) kalabot sa insidente.
Ang Sandy Cay duol sa Pag-asa Island sa West Philippine Sea (WPS), diin nakabase ang mga sundalong Pilipino ug usa ka gamay nga komunidad.
Niadtong Enero, giakusahan sa Philippine Coast Guard ang CCG ug Chinese Navy sa pag-bully sa mga barko sa Bureau of Fisheries and Aquatic Resources (BFAR) nga nagpadulong sa Sandy Cay alang sa usa ka marine survey, nunot sa mga taho sa mga nahugno nga corals nga gibutang sa lugar.
