CCPO nagpasalamat sa PNP sa Samar human mibabag sa P500-M nga shabu

Gipasalamatan ni Cebu City Police Office (CCPO) ang PNP sa Samar human madakpan ang unom ka mga suspek kinsang nagdala og 88 ka kilo sa ginadiling drugas gikan sa Brgy. Tagnao, Gandara, Samar.

Kini human nga gibabag sa otoridad ang P500-million nga balor sa shabu diin dad-on unta kini paingon sa dakbayan sa Sugbo.

Matud ni CCPO Director Police Colonel Vinluan nga nasikop kaniadto ang usa sa mga dinakpan sa Mambaling Police Station sa kasong may kalambigitan sa ginadili nga drugas.

Apan sa pagkagawas sa suspek sa prisuhan, matud pa, nahimo kining usa ka bigtime drug pusher.

Sikop sa maong operasyon ang mga suspek nga silang Cesar Uy, nga taga-Gen. Trias, Cavite, ug silang Steven Perez, Albert Abella, Jeralou Laborte Artuela, Leonard de los Reyes, ug 14-anyos na ulit-tawo na pulos mga taga-Cebu City.

Dugang pa ni Vinluan nga daghan na usab nga mga durugista sa dakbayan ang mabungog sa shabu kung wala kini ma-intercept sa kapulisan sa Samar.

Nanawagan usab si Vinluan nga adunay strength hardening sa mga pier, airports, jail facility ug ingon man sa BuCor.

Giawhag usab sa City director nga mag-negosyo ang uban pang mga negosyante sa dakbayan para mahatagan ug tsansa ang mga tao nga makakita ug trabaho.