CEBU – Nibalik na sa ilahang orihinal nga places of deployment batok sa kriminalidad ang kapulisan sa dakbayan sa Sugbo nunot sa ilang katungdanan sa bag-ohay nga piniliay.
Subay na usab niini, gi-awhag ni Police Lieutenant Colonel Maria Theresa Macatangay, information officer sa CCPO, ang publiko nga kinahanglang magbinantayon sa tanang higayon aron malikayan nga mabiktima sa mga ilegal nga elemento.
Sumala pa ni Macatangay nga ang mga kriminal naghuwat lamang og oportunidad aron mo-atake ug nisugyot nga dili mohatag sa ingon nga opportunidad nga makahimog krimen.
Gawas niini, gihimug-atan usab ni Macatangay nga mas maayo nga adunay mga security camera sa tanang establisemento ug sa ilang immediate premises sanglit dili mahibaw-an sa kapolisan ang maong problema kon dili kini ma-record.
Importante kini alang sa kapolisan sa paghimo og mas maayong pagdeploy ug protocol sa seguridad sa pipila ka mga lugar ilabi na karon nga nisaka na ang ihap sa mga kriminalidad sama sa pagpanulis ug basag-kotse.
