Padayon sa pagpahigayon og bansay-bansay ang Cebu City Police Office (CCPO) ug earthquake drill agi og preparasyon sa mga posibleng pagtumaw sa linog.
Ang maong preparasyon nunot sa nahitabong pagtay-og diin sa Amihanang bahin sa Sugbo, naigo sa 6.9 magnitude nga linog niadtong Setyembre 30, ingun man niadtong Biyernes usab, Oktobre 10, diin adunay laing 7.4 nga linog ug ang epesentro niini didto sa Manay, Davao Oriental.
Matod ni Police Captain Charisma Gonzales, usa kini nga kalihokan nga nagprepara sa mga katawhan, ingun man sa mga personahe sa kapulisan sa Dakbayan sa Sugbo nga padayon ra gihapon ang ilahang earthquake drill simulation hangtud nga hingpit nga mabansay ang matag usa.
Subay niini, nagpadayon gihapon ang ilahang pagtino sa mga safety exits sa ilahang buhatan aron sa pagsiguro nga adunay luwas nga gawsanan sa matag emerhensyang motumaw.
Gawas niina, gikabutyag usab ni Gonzales nga usa sa ilahang gipangandaman mao ang pagkontrolar sa mga tao sa bisan unsang katalagman, busa ilahang giplanohan og asa ang mga dapit sa CCPO ang mamahimong evacuation site.
Gawas niini, nangandam usab ang buhatan sa CCPO og mga disaster kits ug first aid kits alang sa paunang aksyon ugaling adunay dili matag-an nga emerhensya.
