CEBU-Gidawat ni Cebu Archbishop Jose Palma ang pagtudlo ni Pope Francis kaniya isip miyembro sa Dicastery for Culture and Education.
Matud sa arsobispo nga nagpadala na kini ug suwat isip tubag ngadto sa Santo Papa nga mapaubsanon niining gidawat ang maong appointment.
Sigon pa, nasayod kini nga adunay dakong tahas nga nagpaabot kaniya sa maong pagtudlo sa Holy See, butang nga iyahang gipangandaman.
Nagpasalamat na lang kini sa pagsalig nga gihatag sa Santo Papa kaniya.
Gitino usab ni Archbishop Palma nga magpabilin lang kini dinhi sa Sugbo, gawas na lang kung ipatawag kini didto sa Roma alang sa mga importante nga ginbuhaton.
Hinuon, kung ‘meetings’ ang hisgotan, gitataw sa arsobispo nga sukad pa niadtong pandemya kay ipahigayon lang kini pinaagi sa online.
