Nakapalit ang Kagamhanang Lalawigan sa Sugbo og 18-ka bag-ong anesthesia machines nga ipang-apod sa mga tambalanan nga gidumala sa Kapitolyo.
Ang maong mga anesthesia machines kay usa ka 9100c NXT model nga gikan sa GE HealthCare kay usa ka moderno ug highly reliable nga ekipo aron mas tukma ug episyente nga patient care service nga makaabag sa mga clinicians ug mga tambalanan.
Gipang-apod kini sa nagkadaiyang provincial ug district hospitals sa probinsya lakip na ang Cebu Provincial Hospitals sa Balamban, Bogo, Carcar, ug Danao ingon man ang Ricardo L. Maningo Memorial Hospital sa Camotes Island ug Bantayan District Hospital.
Naapuran sab ang Isidro C. Kintanar Memorial Hospital sa Argao, Juan B. Dosado Memorial Hospital sa Sogod, Mariano J. Cuenco Memorial Hospital sa Malabuyoc, ug Minglanilla District Hospital.
Gitinguha nga ang 18 ka mga anesthesia machines nga makapabaskog sa kapabilidad sa mga tambalanan ug mapalambo ang pagdalit niini og essential medical service sa tibuok probinsya.
Kabahin gihapon kini sa inisyatiba sa kasamtangang administrasyon sa paningkamot nga mapakusog ang kapasidad sa serbisyong panglawas sa probinsya ilabi na sa mga hilit nga mga lugar.
