CEBU – Miuyon ang Cebu City Council sa paghangyo sa Department of Public Services (DPS) sa dakbayan nga mosumiter og inventory report sa tanang garbage truck nga gipanag-iya sa siyudad sa o sa dili pa ang Oktubre 5, 2022.
Kini ang gisugyot ni Konsehal Nestor Archival pinaagi sa resolusyon nga iyang gisang-at atol sa regular session sa konseho niadtong Miyerkules, Septiyembre 21.
Matod ni Archival nga gikinahanglan ang imbentaryo aron masayran nila kung pila ka dugang nga mga trak ang gikinahanglan sa pagkolekta sa mga basura sulod sa hurisdiksyon sa dakbayan.
Kini human nireklamo ang mga residente sa pipila ka barangay partikular na ang Barangay Guadalupe nga pipila na ka semana nga wala makolekta ang ilang mga basura.
Sa iyang resolusyon ngadto sa Sangguniang Panlungsod, si Archival niingon nga ang Barangay Guadalupe niangkon usab nga naglisod sa pagkolekta og basura tungod kay kuwang kini og igong mga trak sa pagserbisyo sa 30,000 ka panimalay niini.
