Nagdeklarar ang Kagamhanang Dakbayan sa Sugbo og transport emergency human sa nasinati sa nakalabayng Pasko ug Bag-ong Tuig nga huot nga duot sa trapiko sa dakbayan nga nagpakita sa kahuyang sa pampublikong transportasyon.
Sa eksklusibong pakighinabi sa Bombo Radyo Cebu News Team kang Cebu City Councilor Winston Pepito diin gilatid niini nga niadtong sesyon sa konseho sa dakbayan pag nakalabayng Martes, Enero 6 naaprobahan ang mosyon sa deklarasyon sa transport emergency aron sa pagsulbad sa problema sa trapiko sa dakbayan ilabi na kung adunay major events sama sa Sinulog o peak season sa holidays.
Gani gidugang sa konsehal nga niadtong Disyembre 2025 kay nagdeploy ang dakbayan og public buses aron sa pag-abag sa dagsa sa mga pasahero.
Gipanglantawan sa opisyal nga ang deklarasyon sa transport emergency kay makapagaan sa pampublikong sakayan sa mga ipang deploy niini nga City-owned buses ingon man sa gahum sa mayor sa pakigalayon sa mga transport operators sa adlaw nga daghan ang pasahero sa kadalanan.
Ang deklarasyon sab kay temporaryo lang nga sulbad ug nanginahanglan pa og mas malungtarong solusyon sa natad sa transportasyon sa dakbayan.
