CEBU – Giisip ni Cebu City Mayor Tomas Osmeña nga ang kapulisan ang mismong kaatbang ug kaaway niini.
Sa eksklusibo nga pakighinabi sa Bombo Radyo Cebu kang Mayor Osmeña, gibutyag niini nga sa aspeto sa demokrasya, ang mga pulis ang mu protihir sa katawhan apan giingung lahi ang nahitabu sa dakbayan sa Sugbo.
Matud sa mayor nga mismo na ang mga pulis ang giingung mangulata ug sibilyan inay nga muhatag ug proteksyon.
Subay niini, nanghinaut si Osmeña nga adunay positibo nga tubag ang Commission on Election sa iyahang hangyu nga ipaubus sa Comelec control ang dakbayan.
Samtang, gihimakak ni Cebu City Vice Mayor Edgardo Labella, mayoralty candidate, ang pasangil ni Mayor Osmeña nga migamit kini ug mga pulis alang sa iyahang kandidatura.
Sigon pa nga nasayud ang mga Sugbuanon kung si kinsa ang migamit ug mga pulis sa mga nakalabay nga eleksyon.
Gitataw ni Labella nga daku ang iyahang pagtahud sa kapulisan ug gituhu-an niini nga ipabilin sa PNP ang kahapsay ug kalinaw sa umaabut nga eleksyon.
Gi-uyunan usab sa bise mayor ang hangyu ni Osmeña sa Comelec nga ipaubus ang dakbayan sa Sugbo sa Comelec control.
