CEBU CITY-Gipahibalo ni Cebu City Police Office Acting Director PCol Antonietto Cañete nga dili importante alang kaniya kon mahatagan siya og kahigayonan nga makahupot sa katungdanan sa hingpit nga kapasidad o matangtang sa katungdanan.
Mao kini ang komento ni Cañete sa gipaabot nga pagpili ni City Acting Mayor Raymond Alvin Garcia sa bag-ong City Director sa dakbayan.
Kahinumduman nga pormal siyang nilingkod niadtong Hulyo 26 o hapit duha ka semana na ang milabay.
Gihatagan og gibug-aton ni Cañete nga dili importante alang kaniya ang maong posisyon kon dili ang pagserbisyo og tarong sa mga Sugbuanon.
Gani, matud niya wala siya mo-apply isip City director apan tungod kay nakita sa Philippine National Police ang iyang dedikasyon sa pagtrabaho ug paghatag og maayong output, wala na kadudahan ang iyang kapasidad ug natudlo siya sa maong posisyon.
Sa laing bahin, gibutyag usab ni PLt Col Gerard Ace Pelare, ang tigpamaba sa PRO-7 nga lakip sa lima ka pangalan nga gikan sa mga opisyal sa PRO-7 ang pilian ni Garcia.
Ingon man nga wala kini maghisgot kung kinsa ang laing upat pa.
Matod ni Pelare, ubos sa balaod, hatagan kini og lima ka pangalan sa mga girekomendar ug sa higayon nga mapili, mao na’y matudlo nga permanenteng City director.
