CEBU CITY- Giila ang Cebu City Police Office (CCPO) isip Rank No. 1 sa tibuok Police Regional Office 7 (PRO 7) atol sa ika-15 nga Simultaneous Anti-Criminality Law Enforcement Operations (SACLEO) Performance Rating nga gipahigayon gikan Hunyo 27 hangtod 29, 2025.
Pinangulohan ni Acting City Director PCOL Enrico Evangelista Figueroa, nagpabiling lig-on ang panindugan sa CCPO sa ilang kampanya batok sa krimen ug sa pagpanalipod sa katawhan sa Dakbayan sa Sugbo.
Base sa datos nga gipagawas sa PRO 7, mikabat og 42 ka anti-illegal drug operations ang gipahigayon sa CCPO, nga nagresulta sa pagkaaresto sa 54 ka mga suspetsado ug pagkumpiska sa kapin 373.35 gramos sa gituohang shabu nga adunay kantidad nga PHP 2.5 milyon.
Gawas pa niini, batok sa mga wanted persons, anaa sa 10 ang nasikop, ug 6 ka operasyon batok sa loose firearms ang misangpot sa pagkaaresto sa 5 ka tawo, pagkumpiska sa 5 ka pusil, ug 1 ka explosive device.
Matod pa ni PCOL Figueroa, ang maong kalampusan nagpakita sa determinasyon sa CCPO sa pagpadayon sa limpyo ug hugot nga kampanya kontra kriminalidad. Kini subay sa mandato sa PNP Chief PGEN Nicolas Torres III, aron mas epektibong masulbad ang mga isyu sa seguridad.
Si PRO 7 Regional Director PBGEN Redrico A. Maranan misuporta usab sa dakong kampanya sa kalinaw ug kahusay sa Central Visayas.
Ang CCPO naningkamot usab nga mapalig-on ang relasyon sa komunidad, isip usa ka importante nga lakang aron makab-ot ang tinuod nga seguridad ug kalinaw sa Dakbayan sa Sugbo.
