Padayon ang imbestigasyon sa alegasyon sa giingong nahitabong 'abduction' nila ni Diane Gumanao ug Arman Dayuha niadtong Enero 10 sa dakbayan sa Sugbo.
Una niini, Giawhag ni Cebu City Police Office (CCPO) Director, Police Colonel Ireneo Dalogdog, ang ginikanan, ug mga opisyal sa University of the Philippines-Cebu, nga makig-alayon kanila sa kabahin sa naasoy na imbestigasyon.
Matud ni Colonel Dalogdog nga dili na kinahanglan nga patas-on pa ang maong isyu ug maduhig pa ang ngalan sa kapulisan hinungdan nga naghangyo sila nga makig-alayon kanila ang mga nahisgutan arun nga madakpan ug makasohan ang mga naghimo sa giingong abduction o kidnapping.
Bisan paman nga anaa na sa ilang mga ginikanan ang mga gikatahong biktima sa abduction padayon ang kapulisan sa pagkuha ug mga dugang pang impormasyon aron mahatagan ug katin-awan ang mga katawhan kung unsa man gyud ang tinud-anay nga panghitabo.
Gipasalig nalang sa opisyal nga dili sila mohunong aron nga malimpyohan usab ang ilang pangalan.
