PROVINCE OF CEBU-Nakakaplag ug kaalyado si Cebu Gobernador Gwen Garcia sa Negros Oriental Gobernador Manuel “Chaco” Sagarbarria kinsa miuyon sa prinsipyo alang sa paghimo sa managsama nga mga palisiya tali sa duha ka mga probinsiya sa pagdumala sa mga hulga sa mga sakit sa baboy.
Kini human nga nipadayag si Gobernador Sagarbarria, atol sa pagbisita sa buhatan ni Gobernador Garcia nga ang duha ka probinsiya mopirma sa umaabot nga mga adlaw sa usa ka memorandum of agreement nga maglatid sa managsamang protocols mahitungod sa biosecurity measures, ingon man sa pagpadali sa paglihok sa mga baboy ug kalambigit nga mga produkto ngadto sa ilang tagsa-tagsa ka teritoryo pinaagi sa pagtangtang sa pagdili sa mga baboy gikan sa BAI-declared ASF-infected zones.
Ang gobernador sa Negros Oriental maoy labing unang local chief executive gawas sa Sugbo nga nitubag sa imbitasyon ni Gobernador Garcia alang sa nagkahiusang prente sa pakigbatok sa ekonomikanhong disruptive nga mga palisiya sa BAI sa pagdumala sa mga sakit sa baboy sama sa ASF ug hog cholera.
Kung kahinumduman nga si Gobernador Garcia nipagawas niini nga panawagan atol sa press conference sa Municipal Hall sa Tudela sa Camotes niadtong Hunyo 8 human makadawat og taho nga ang mga baboy sa Camotes dili na welcome sa silingang Leyte ug Samar human gideklarar sa BAI nga ASF-infected ang Sugbo nga red zone.
Gihangop ni Gobernador Garcia ang maong lakang ni Gobernador Sagarbarria bisan sa iyang pagpahinumdom sa ubang mga local chief executives nga ipatigbabaw kanunay ang lokal nga awtonomiya atubangan sa mga polisiya ug protocol nga nagdala og kasakit sa kinabuhi ug panginabuhian sa katawhan.
