Miaprubar ang Cebu Provincial School Board (CPSB) og 85-milyon nga badyet para sa pagtukod og Temporary Learning Shelters (TLS) puli sa mga nadaot nga tunghaan.
Kini ang desisyon sa CPSB, nga gipangulohan ni Gobernador Pamela Baricuatro, sa dihang nagtigom kini sa Kapitolyo aron susihon ang gilapdon sa kadaot sa mga classroom, ilabina sa amihanang Cebu, ang sentro sa linog.
Gikumpirma sa Department of Education (DepEd) Cebu Province nga 570 ka classroom ang hingpit nga naguba human sa linog.
Base sa validated report, ang ahensya miingon usab nga, gawas sa hingpit nga naguba nga mga classroom, adunay kinatibuk-an nga 1,101 ang nakaangkon og dakong kadaot sa istruktura, ug 1,723 ang nakaangkon og gamay nga kadaot.
Magkinahanglan ang probinsya og 269 ka Temporary Learning Shelters aron ma-accommodate ang mga nawad-an og puy-anan nga mga estudyante.
Magsilbing temporaryo nga mga classroom ang TLS samtang ang DepEd naghimo og halapad nga pag-ayo ug pagtukod pag-usab sa nadaot nga mga edipisyo sa eskwelahan.
Matud ni Provincial Treasurer Roy Salubre nga ang CPSB adunay 1.128 bilyon nga magamit nga pondo, nga adunay dugang nga 800 milyon nga gilauman gikan sa mga koleksyon, nga nagdala sa kinatibuk-an ngadto sa hapit 2 bilyon.
Kini nga mga pondo mosuporta sa nagpadayon nga mga inisyatibo sa CPSB aron matabangan ang DepEd nga masiguro nga ang mga klase magpadayon bisan pa sa katalagman.
