CENTRAL VISAYAS- Nakasulod sa Top 40 delegates ang mga representante gikan sa Cebu City, Cebu Province, ug Province of Bohol sa Miss Universe Philippines 2026, nga nagpakita sa lig-on nga presensya sa Kabisay-an sa nasudnong entablado sa pageantry.
Lakip sa mga nakalusot ang mga ilado na sa kompetisyon nga sila si Apriel Smith sa Cebu City, Nicole Borromeo sa Cebu Province, ug Kathleen Dale Casenas nga nagrepresentar sa Bohol.
Ilado na sa industriya sa pageant sila si Smith ug Borromeo, nga pareho nang adunay halapad nga kasinatian.
Si Borromeo, 25 anyos, nakadaog sa Binibining Pilipinas International title niadtong 2022 ug mirepresentar sa Pilipinas sa Miss International 2023, diin nakab-ot niya ang third runner-up finish. Nakigkompetensya usab siya sa Miss Mandaue 2018 ug nahimong first runner-up sa Miss Universe Philippines Cebu 2025 nga gidaogan ni Gabbi Carballo.
Sa laing bahin, si Smith maoy unang gikoronahan nga Binibining Cebu niadtong 2017. Miapil usab siya sa Miss Universe Philippines 2020, diin nakasulod siya sa Top 16 usa ka pamatuod sa iyang padayon nga kalig-on ug consistency sa pageantry scene.
Samtang, si Casenas nagdala og lahi ug personal nga istorya sa iyang pag-apil.
Gipadako sa Batangas, adunay inahan nga Bicolana ug amahan nga gikan sa Jagna, Bohol, iyang gidala ang nagkahiusang kultura nga nakahulma sa iyang pagkatawo.
Pinaagi sa iyang pagrepresentar sa Bohol, iyang gipasidunggan ang gigikanan sa pamilya sa iyang amahan ug ang kabilin nga iyang gipasigarbo.
Ang pagsulod sa tulo ka kandidata sa Top 40 nagpakita sa padayon nga paglambo sa kalidad ug talento sa mga Bisaya sa natad sa sa pageantry, ug naghatag og dugang nga kadasig sa ilang mga tagasuporta samtang padulong ang kompetisyon sa mas masulod nga mga hugna.
